|
 سەرمایەدارێكی
كورد لە ئەڵمانیا : ئـەڵمانـیا هیـچ نرخێـك بۆ كورد دانـانێ
هیچ تروسكاییەكی ژیان بۆ حوسێن ئەشا، لەباكووری كوردستان نەمایەوە كاتێك خوێندكار
بوو لە زانكۆی ئیستەنبۆڵ و كاری سیاسی دژی پارتی بزووتنەوەی نەتەوەیی تورك و توركە
فاشیستەكان دەكرد، بەم كارە سیاسیەشی رێگەی چوونە زانكۆی لێ قەدەخەكرا و، 30 ساڵ
پێش ئێستا لە نیشتمانەكەی خۆی سەری هەڵگرت و لە ئەڵمانیا گیرسایەوە، ئێستا وەك
یەكێك لەكوردە سەرمایەدارەكانی تاراوگە كاری بیناسازی دەكات، بەڵام دەڵێت "نەبوومەتە
ملیۆنێر".
حوسێن ئەشا، نموونەیەكە لەو سەدان هەزار كوردەی باكوور كە بەهۆی قەدەخەكردنی زمان و
رێگرییەكانی بەردەم ئازادی بیروڕا لەلایەن دەوڵەتی توركیاوە، رێگەی تاراوگەی
هەڵبژاردووە. ئەو لەساڵی 1977 لەرێگای پورێكییەوە دەگاتە بەرلین و، دوای ساڵێك
خوێندنی زمان، دەست بە خوێندنی زانكۆ دەكات، ئەو كاتەش كە خوێندكاری زانكۆ بووە بۆ
دابینكردنی خەرجییەكانی كاری كردووە و لەهەمانكاتیشدا درێژەی بەكاری سیاسی داوە،
دەڵێت "ئەوكات توركەكان زۆر دژایەتی ئێمەیان دەكرد"، لەوێش دوای 10 ساڵ بەشی
بیناسازی لە زانكۆی تەكنیك تەواو دەكات و لەساڵی 1990 بەدواوە كاری بیناسازی دەكات
و ئێستاش خاوەنی كۆمپانیای خۆیەتی.
حوسێن ئەشا، لەشارۆچكەی دۆغان شەهیری سەر بە شاری مەڵاتیەی باكووری كوردستان
لەدایكبووە، ئەوكات لەریزی پارتی رەنجی كۆمۆنیستی توركیا، كاری سیاسی دەكرد كە
زۆربەی ئەندامانی خەڵكی كوردستان بوون، دوای هەڵوەشانەوەی ئەو پارتە، ئەوان پارتی
كۆمۆنیستی كوردستان دادەمەزرێنن، حوسێن لە هەڤپەیڤینێكدا بە (رووداو)ی راگەیاند "ئەوە
یەكەمجاربوو حیزبێك بەناوی پارتی كۆمۆنیستەوە لە باكووری كوردستان بێتە دامەزراندن"،
ئەو لەكاتێكدا خەریكی بازرگانییە، بەرپرسی بەرلینی پارتی كۆمۆنیستی كوردستانیشە.
پارتەكەیان لەتوركیا نهێنییە و مۆڵەت پێ نەدراوە،، لەگەڵ ئەوەی 3 كۆنفرانسیان
ئەنجامداوە، بەڵام بە نیازن پارتێكی یاسایی لە توركیا و باكووری كوردستان دروستبكەن،
دەڵێت "لەوانەیە ئەمساڵ رایبگەیێنین، ئێمە دەمانەوێ هەموو كەسانی سۆسیالیست
كۆبكەینەوە".
ئەو سەرمایەدارە كۆمۆنیستە، خۆی وەكو ملیۆنێر و دەوڵەمەند نابینێ، بەڵام ئاماژە
بەوە دەكات كە لەئەڵمانیا ملیۆنێری كورد بەژمارە كەمن. ئەو بۆ كارەكانی بایەخ بەوە
دەدات كار بە كرێكارانی كورد بكات. ئەو ئێستا90%ی كرێكارەكانی كوردن. لەبارەی رێژەی
كار لەسەردەمی ئێستادا دەڵێت "لەساڵی 1990 تاوەكو 2003 كار هەبوو، قازانجیش باشبوو،
بەڵام ئەوە چەند ساڵێكە رەوشەكە خراپ بووە، بەتایبەتیش كەنرخی یۆرۆ زۆر
بەرزبووەتەوە، بێكاری زۆرە و كار نییە، كۆمپانیاكانیش كار و كۆنتراكتەكانیان دەدەنە
كۆمپانیا بچووكەكان و سوودەكە لەنێوان یەكتردا دابەشدەكەن". حوسێن ئەشا گوتیشی "راستە
لە كوردستان ئێستا دەوڵەمەند هەن، بەڵام هەژار و بێكار زۆرن، بۆیەش پێویستە حیزبێك
هەبێت دژی سیستەمی كاپیتالیزم".
بەهۆی زۆری خەڵكانی تورك و دەوڵەمەندەكانیان لە ئەڵمانیا، جگە لە پەیوەندی توندو
تۆڵی توركیا لەگەڵ ئەڵمانیا، دەوڵەمەندە توركەكانی ئەڵمانیا توانیویانە كاریگەری
لەسەر سیاسەتی ئەڵمانیا دابنێن، ئەو دەڵێت "ئەز خاوەن كۆمپانیایەكی تورك دەناسم
فڕۆكەی هەن، ئەوە 20 ساڵە ئەوكارە دەكات و زۆر كۆمپانیا لە توركیا دێن لێرە پشك
دەكڕن، لێرە كارگەی باش دامەزراون بۆ فرۆشتنی گۆشتی دۆنەر، ئەو خواردنانەی كورد و
عەرەب و تورك دەیخۆن، لەلایەن ئەو میللەتانەوە دێنە دروستكردن. خاوەن كارگە و
كۆمپانیای كوردی ئەو جۆرە خۆراكانەش هەن. لێرە كۆمپانیای زۆزان و تەك دۆنەر و زۆر
كۆمپانیای دیكەی كوردان هەن"، هەروەها گوتیشی "دەوڵەتی ئەڵمانیا بەهۆی
پەیوەندییەكانی لەگەڵ توركیا، سیاسەتەكەی لەگەڵ كوردان باش نییە، ئەڵمان كورد قبوڵ
دەكەن، بەڵام هیچ نرخێك بە كورد نادەن".
ئەو هەرچەند زیاتر لەسەر قەدەخەكردنی زمانی كوردی دەوەستێت لەباكوور، بەڵام
حیزبەكەیان بڵاوكراوەیان نییە بە زمانی كوردی "ئەو كەموكوڕییە هەیە، ئەگەر
بڵاوكراوەكانمان هەموو بكەینە كوردی، كەس ناتوانێ بیانخوێنێتەوەو تێیانبگات، ئەو
داخوازە هەیە، بەڵام پێویستە یەكەمجار رۆشنبیران خۆیان فێری كوردی بكەن".
ئەشا 3 منداڵی هەیە كە چوار ساڵە بەكوردی قسەیان لەگەڵ دەكات و نەیناردوونەتە كۆرسی
زمانی توركی، بەڵام كە سەردانی كوردستان دەكەن (هێلین)ی كچە گەورەكەی حوسێن ئەشا
تووشی شۆك بوو كاتێك خزم و دراوسێكانیان بەكوردی قسەیان لەگەڵ هێلین نەكرد، ئەشا
دەڵێت "هێلین پێیگوتم باوكە ئەوە چ زمانێكە، تۆ لەوێ ئێمەت فێری كوردی كرد، كەچی
ئەوان لەكوردستان بە توركی قسەمان لەگەڵ دەكەن"، باوكی هێلین باسی لەوەشكرد كە
ئێستا منداڵەكانی وازیان لەزمانی كوردی هێناوەو تەنیا ئەڵمانی دەزانن "هیوداربووم
فێری خوێندن و نووسینی كوردی ببن، بەڵام لەكوردستان تووشی شۆك بوون".
|
